Маратонецот на шалтерите: Новиот глобален спорт

Некаде помеѓу официјалното време за пауза и оној момент кога службеникот ви кажува „Вратете се утре“, се случува вистински маратон. Но, еве една добра вест: македонската администрација, и покрај долгогодишниот тренинг во неефикасност, всушност значително се подобри последниве 10-ина години. Од друга страна, Германија, некогашниот пример за организираност и прецизност, реши да научи од нашиот „поетски хаос“. Денес, германската администрација сѐ почесто го спроведува неефикасниот систем кој ние, полека и со многу труд, го напуштаме.

Тренинг план:
Како да преживеете на шалтерот? Ќе ви требаат:

1. Издржливост: За трчање од шалтер до шалтер, барајќи кој точно го чува вашиот „загубен“ документ.
2. Ментална сила: За да издржите коментари како: „Таа колешка не е тука“, „Фалат уште два документи“, или „Системот ни е паднат“.
3. Интуиција: За да го погодите вистинскиот шалтер од прва, оти на таблата пишува едно, а службеникот се преместил кај колегата „на кафе“.

Опрема за успех:

• Торба со храна: За чекање што трае подолго од серија на Нетфликс.
• Два примероци од секој документ: Зашто, за секој случај, копијата може да заврши мистериозно „архивирана“.
• Google Translate: Задолжителен во Германија, каде германскиот е свет јазик, но документите понекогаш се и на латински. Но, не помалку потребен и во Македонија, каде често е тешко да завршиш работа на шалтер ако не владееш барем со основен албански. А, како што одат работите, кој знае – можеби наскоро ќе треба да приучиш и по некоја буква од бугарски, чисто за секој случај.
• Повикај пријател: Во случај сето ова да ве исфрли од такт, секогаш има некој кој „познава човек“ што може да ја заврши работата за час. Оваа стратегија, и покрај сите административни реформи, сѐ уште владее во нашите краеви.

Психолошка поддршка:

• Никаде не се брзам: „Имам уште 30-ина години до пензија. Голема е шансата, некаде пред самата пензија, да ја завршам процедурата за запишување на стажот што службите пропуштиле да ми го евидентираат. Дотогаш веројатно ќе ги исплатам двата кредити – едниот за летување, а вториот, најновиот, за зимување.“
• Прифатете го хаосот: Со ова темпо, ќе почнете да се чувствувате како да сте дел од некој апсурден театар.

Заклучок:
Шалтерите низ светот стануваат новото поле за глобална рамноправност. Додека Македонија се труди да го напушти „системот за бавна тортура“, Германија и другите „напредни“ земји полека ја усвојуваат нашата некогашна хаотична уметност. На крајот од денот, важно е да разбереме: маратоните на шалтерите не се само административна пракса – тие се животна филозофија.